Manifesto Barisan Nasional ngangatka PRU13

Najib besemaya nadai seiku rayat Malaysia deka dikelaung enti sema diberi kuasa baru megai perintah

KUALA LUMPUR: Empat hari agi deka netapka hari bulan ngantung nama chalun enggau muai undi ungkup pengawa bepilih besai ke-13 (PRU13), Datuk Seri Najib Tun Razak begulai enggau rayat malam tu (kemari) mantaika manifesto tauka danji pengawa bepilih Barisan Nasional (BN), besemaya nadai seiku rayat Malaysia deka dikelaungka enti sema diberi kuasa baru megai perintah.

Pengawa nya ngayanka dalam dua pekara – keterubah BN bejadika manifesto pengawa bepilih besai sebedau hari ngantung nama chalun, lalu nyelai ari ke ngelamatu, dokumen sepenebal 31 lambar nya mantaika mayuh komitmen, projek enggau program.

Dalam Stadium Tertutup Putra ditu ke mayuh agi digulu penyukung BN, Menteri Besai bejaku bekaul enggau juluk ati iya ngagai menua nyengkaum raban nembiak rebak baru, ba penatai ketuai parti-parti komponen BN enggau nengeri ke diperintah gempung parti nya.

Dalam atur ngulihka kuasa baru ari rayat ketegal deka merintah dudi ila, Najib mega bisi mantaika riput kad perintah BN bekaul enggau pemujur iya megai kuasa merintah sepengelama empat taun, ngangkatka agi pengulih iya ngamatka semua komitmen enggau danji ke bisi dalam manifesto nya.

Pagi tadi (kemari), lebuh iya benung ba Kuantan maya bejadika ‘Hari Terbuka Angkatan Tentera’ ba pangkalan Tentera Udara Diraja Malaysia, Najib ngutuk parti penyakal laban ngeleseka pengangkun raban soldadu enggau polis ke berambunka nyawa ngetanka menua ari keruga penyelawai di Lahad Datu, Sabah.

Iya madah pengelikun menua nyadika tiang pemujur agenda transformasyen menua.

Berebak enggau nya, Sapit Najib, Tan Sri Muhyiddin Yassin pagi tadi (kemari) bisi matau gaya utai ti nyadi ba sitak Parlimen Lembah Pantai ke dipegai penyakal lalu ari perati iya bisi bendar pengarap BN ulih ngerampas penuduk nya.

Iya mega minta rayat manding manifesto BN enggau manifesto penyakal.
“Manifesto BN tu sebengkah danji antara BN enggau rayat ke deka mai pengelantang enggau pemansang kelebih agi dalam timpuh lima taun ke deka datai tu nya beguna bendar ungkup kitai nyapai tikas menua maju,” ku iya. — Bernama